അമേരിക്കൻ പ്രസിഡന്റ് തെരഞ്ഞെടുപ്പ് എങ്ങനെ ?

നാലു വർഷം കൂടുമ്പോഴാണ് അമേരിക്കയിൽ പ്രസിഡന്റ് തെരഞ്ഞെടുപ്പ് നടക്കുന്നത്.  അമേരിക്കൻ പ്രസിഡന്റ് സ്ഥാനത്തേക്ക് മൽസരിക്കാൻ ആർക്കാണ് യോഗ്യത എന്നതാണ് ആദ്യ ചോദ്യം. ഉത്തരം ലളിതമാണ്. മൂന്നു നിബന്ധനകൾ.
അമേരിക്കയിൽ തന്നെ ജനിച്ച പൗരനായിരിക്കണം,
മുപ്പത്തിയഞ്ച് വയസ് തികഞ്ഞ വ്യക്തിയായിരിക്കണം,
കഴിഞ്ഞ പതിനാലു വർഷമെങ്കിലും അമേരിക്കയിൽ സ്ഥിര താമസുള്ള വ്യക്തി അഥവാ റസിഡന്റ് ആയിരിക്കണം.

പ്രസിഡന്റാകാൻ ആഗ്രഹമുള്ളവർ പ്രധാനമായി രണ്ടു പാർട്ടികളുടെ നോമിനേഷനാണ് തേടുക. യാഥാസ്ഥിതികരുടെ കക്ഷിയായ റിപ്പബ്ലിക്കൻ പാർട്ടിയും ലിബറലുകളും പ്രോഗ്രസീവുകളും അടങ്ങുന്ന ഡെമോക്രാറ്റിക് പാർട്ടിയുമാണ് പ്രസിഡന്റ് തെരഞ്ഞെടുപ്പിൽ നേർക്കുനേർ പോരാടുന്നത്.  ലിബർട്ടേറിയൻ പാർട്ടി, ഗ്രീൻ പാർട്ടി, കോൺസ്റ്റിറ്റ്യൂഷൻ പാർട്ടി തുടങ്ങിയ പാർട്ടികളുണ്ടെങ്കിലും ഇന്നത്തെ രാഷ്ട്രീയ ചിത്രത്തിൽ അവർ നിലവിൽ തീർത്തും ദുർബലരാണ്. ഗ്രാന്റ് ഓൾഡ് പാർട്ടി അഥവാ ജിഓപി എന്നും റിപ്പബ്ലിക്കൻ പാർട്ടി അറിയപ്പെടുന്നു. നികുതി കുറക്കുക, തോക്ക് കൈവശം വക്കാനുള്ള അവകാശത്തെ സംരക്ഷിക്കുക, കുടിയേറ്റ നിയമം കൂടുതൽ കർക്കശമാക്കുക, ഗർഭച്ചിദ്രത്തെ എതിർക്കുക തുടങ്ങിയ പൊതു നിലപാടുകളാണ് റിപ്പബ്ലിക്കന്മാരുടേത്. മേൽപറഞ്ഞ വിഷയങ്ങളിലെല്ലാം തീർത്തും വ്യത്യസ്ഥമായ നിലപാടാണ് ഭൂരിഭാഗം ഡെമോക്രാറ്റുകൾക്കുമുള്ളത്. ഡെമോക്രാറ്റുകളിൽ തന്നെ മോഡറേറ്റുകളും പ്രോഗ്രസീവുകളും പല വിഷയങ്ങളിലും വ്യത്യസ്തമായ നിലപാടുകൾ കൈക്കൊള്ളാറുണ്ട്. പാർട്ടിയുടെ സ്ഥാനാർഥിത്വം തേടുക എന്നതാണ് ആദ്യ കടമ്പ. പ്രസിഡന്റാകാൻ താൽപര്യമുള്ള പത്തോ ഇരുപതോ നേതാക്കൾ അതത് പാർട്ടികളുടെ നോമിനേഷനായി രംഗത്തുവരും. ഇവർ സംവാദങ്ങളിൽ പങ്കെടുക്കുകയും തങ്ങളുടെ പ്രചാരണത്തിന്  ആവശ്യമുള്ള പണം സ്വരൂപിക്കുകയും ചെയ്യും. രണ്ടു രീതികളിലാണ് ഈ സ്ഥാനാർഥിത്വ നിർണയം നടക്കുക. ഇതിനായി  വിവിധ സംസ്ഥാനങ്ങളിൽ കോക്കസുകളും പ്രൈമറികളും നടത്തും.  പാർട്ടികളുടെ അംഗങ്ങൾ ആർക്ക് വോട്ട് ചെയ്യണമെന്ന് യോഗം കൂടി ചർച്ച ചെയ്ത് തീരുമാനിക്കുന്ന  രീതിയാണ് കോക്കസ്. ചില സംസ്ഥാനങ്ങൾ ഈ രീതി പിന്തുടരുന്നു. അതേസമയം അതത് പാർട്ടികളുടെ റജിസ്റ്റർ ചെയ്ത വോട്ടർമാർ പോളിങ്ങിലൂടെ തന്നെ സ്ഥാനാർഥിയെ തെരഞ്ഞെടുക്കുന്ന രീതിയാണ് പ്രൈമറി. ഭൂരിഭാഗം സംസ്ഥാനങ്ങളും ഈ രീതി പിന്തുടരുന്നു. പകുതി സംസ്ഥാനങ്ങളിലും പ്രൈമറിയും കോക്കസും കഴിയുന്നതോടെ സാധ്യത കുറഞ്ഞ സ്ഥാനാർഥികൾ മൽസരത്തിൽ നിന്ന് പിന്മാറുന്നു.  രണ്ടോ മൂന്നോ പേർ മാത്രം മൽസര രംഗത്ത് ഇതോടെ ബാക്കിയാകും . പിന്മാറിയ സ്ഥാനാർഥികളും അവരുടെ അണികളും പലപ്പോഴും മൽസര രംഗത്തുള്ളവരിൽ ആരുടെയെങ്കിലും പക്ഷം ചേരുകയും അവസാനം ഒരു സ്ഥാനാർഥി എന്ന നിലയിലേക്ക് എത്തി പ്രൈമറി പ്രക്രിയ പൂർത്തിയാവുകയും ചെയ്യുന്നു. ഈ വർഷം നിലവിലെ പ്രസിഡന്റ് ഡോണാൾഡ് ട്രംപും മുൻ വൈസ് പ്രസിഡന്റ് ജോ ബൈഡനുമാണ് പ്രസിഡന്റ് സ്ഥാനത്തിനായി പോരാട്ടത്തിലുള്ളത്. ജോ ബൈഡൻ, ബേണി സാന്റേഴ്സ്, എലിസബത്ത് വാറൻ കമല ഹാരിസ്, പീറ്റ് ബുട്ടിജിജ്, തുടങ്ങിയവരൊക്കെ ഡെമോക്രാറ്റ് നിരയിൽ  പ്രൈമറിയിൽ പോരാട്ടത്തിനുണ്ടായിരുന്നുവെങ്കിലും ജോ ബൈഡന് സ്ഥാനാർഥിത്വം ലഭിക്കുകയായിരുന്നു. ഒരു തവണ പ്രസിഡന്റായ വ്യക്തി രണ്ടാമൂഴം തേടുകയാണെങ്കിൽ ആ പാർട്ടി മിക്കവാറും ആ സ്ഥാനാർഥിയുടെ പിറകെ അണിചേരും. എതിർത്ത് മൽസരിക്കാൻ ആരെങ്കിലുമുണ്ടെങ്കിൽ തന്നെ പാർട്ടിയുടെ പിന്തുണ ഇല്ലാത്തതിനാൽ വോട്ട് കിട്ടാതെ പോവുകയാണ് പതിവ്. സ്വാഭാവികമായി ഡോണാൾഡ് ട്രംപ് രണ്ടാമൂഴം തേടുന്നതിനാൽ റിപ്പബ്ലിക്കൻ പാർട്ടി ഇത്തവണ അദ്ദേഹത്തിന്റെ സ്ഥാനാർഥിത്വമാണ് സ്വീകരിച്ചത്.   പ്രൈമറി തെരഞ്ഞെടുപ്പ് പൂർത്തിയായാൽ അതത് പാർട്ടികൾ ദേശീയകൺവെൻഷൻ ചേർന്ന് സ്ഥാനാർഥിയെ ഔദ്യോഗികമായി നാമനിർദേശം ചെയ്യും. പ്രസിഡന്റ് സ്ഥാനാർഥിയാണ് വൈസ് പ്രസിഡന്റായി ആരു മൽസര രംഗത്തുണ്ടാകണമെന്ന് തീരുമാനിക്കുന്നത്. ഈ തീരുമാനവും കൺവെൻഷനിൽ തന്നെ പ്രഖ്യാപിക്കും. റണ്ണിങ്ങ് മേറ്റ് എന്നാണ് വൈസ് പ്രസിഡന്റ് സ്ഥാനാർഥിയെ വിളിക്കുന്നത്. ഇന്ത്യൻ വംശജയായ കമല ഹാരിസിനെയാണ് ഇത്തവണ ജോ ബൈഡൻ വൈസ്പ്രസിഡന്റ് സ്ഥാനാർഥിയാക്കിയത്. നിലവിലെ വൈസ് പ്രസിഡന്റ് മൈക്ക് പെൻസ് തന്നെയാണ് ട്രംപിന്റെ റണ്ണിങ്ങ് മേറ്റ്.  മാസങ്ങളോളം നടക്കുന്ന പ്രചാരണത്തിനിടെ പ്രസിഡന്റ് സ്ഥാനാർഥികൾ തമ്മിലും വൈസ് പ്രസിഡന്റ് സ്ഥാനാർഥികൾ തമ്മിലും സംവാദവും സംഘടിപ്പിക്കും. ഈ സംവാദങ്ങളാണ് അമേരിക്കൻ തെരഞ്ഞെടുപ്പിലെ ഒരു പ്രധാന ഹൈലൈറ്റ്.

നവംബറിലെ ആദ്യ തിങ്കളാഴ്ചക്കു ശേഷം വരുന്ന ചൊവ്വാഴ്ചയാണ് അമേരിക്കയിൽ തെരഞ്ഞെടുപ്പ് നടക്കുക. അങ്ങനെ നോക്കുമ്പോൾ രണ്ടായിരത്തി ഇരുപതിൽ അത് നവംബർ മൂന്നിനാണ് . തെരഞ്ഞെടുപ്പ് കഴിഞ്ഞ് രണ്ടു മാസം പിന്നിട്ട് ജനുവരി ഇരുപതിനാണ് പുതിയ പ്രസിഡന്റ് സത്യപ്രതിജ്ഞ ചെയ്ത് അധികാരമേൽക്കുക.

അമേരിക്കൻ പ്രസിഡന്റ് തെരഞ്ഞെടുപ്പ് രീതിയെക്കുറിച്ച് സംസാരിക്കുമ്പോൾ മറ്റു രാജ്യങ്ങൾക്ക് ആശയക്കുഴപ്പം ഉണ്ടാക്കുന്ന വാക്കാണ് ഇലക്ടൽ കോളജ്. എന്താണ് ഇലക്ട്രൽ കോളജ് എന്നറിയാതെ അമേരിക്കൻ തെരഞ്ഞെടുപ്പ് പൂർണമായി മനസിലാക്കാനാകില്ല തന്നെ.

പ്രസിഡന്റിനെ ഔദ്യോഗികമായി തെരഞ്ഞെടുക്കാൻ ഓരോ സംസ്ഥാനവും നിയമിക്കുന്ന ഒരു കൂട്ടം വ്യക്തികളടങ്ങുന്ന സംവിധാനമാണ് ഇലക്ട്രൽ കോളേജ്. മറ്റൊരു രീതിയിൽ പറഞ്ഞാൽ ജയിക്കുന്ന സ്ഥാനാർഥിയെ ഔദ്യോഗികമായി പ്രസിഡന്റാക്കാനായി ഓരോ സംസ്ഥാനവും നിയമിക്കുന്ന പ്രതിനിധികളാണ് ഇലക്ട്രർമാർ. ഈ ഇലക്ടർമാരടങ്ങുന്ന ബോഡിയാണ്  ഇലക്ട്രൽ കോളേജ്. അമേരിക്കൻ ഭരണഘടനയുടെ ആർട്ടിക്കിൾ രണ്ട് , സെക്ഷൻ ഒന്ന്, ക്ലോസ് രണ്ടിൽ ഓരോ സംസ്ഥാനത്തിലും എത്ര ഇലക്ട്രൽ വോട്ടുകളുണ്ടെന്ന്  നിഷ്കർഷിച്ചിരിക്കുന്നു. 1964 മുതൽ രാജ്യം മുഴുവൻ 538 ഇലക്ടർമാരാണ് പ്രസിഡന്റിനെ തെരഞ്ഞെടുക്കാനായി നിയോഗിക്കപ്പെടുന്നത്. അമേരിക്കൻ കോൺഗ്രസിലെ വോട്ടിങ്ങ് അംഗസംഖ്യക്ക് തുല്യമായ പ്രതിനിധകിളാണ്  ഇലക്ട്രൽ കോളജിലുള്ളത്. ജനപ്രതിനിധി സഭയിൽ നാനൂറ്റിമുപ്പത്തിയഞ്ച് അംഗങ്ങളും സെനറ്റിൽ നൂറ് അംഗങ്ങളും വാഷിങ്ങ്ടൺ ഡിസിയുടെ മൂന്നു പ്രതിനിധികളും ചേർന്നാണ് അഞ്ഞൂറ്റിമുപ്പത്തിയെട്ട് ആകുന്നത്. തെരഞ്ഞെടുപ്പിൽ ഡെമോക്രാറ്റുകളും റിപ്പബ്ലിക്കന്മാരും ഇരുനൂറ്റി എഴുപത് ഇലക്ടർമാരെയെങ്കിലും തങ്ങൾക്ക് അനുകൂലമാക്കാനുള്ള ശ്രമമാണ് നടത്തുന്നത്. ഇരുനൂറ്റിയെഴുപത് ഇലക്ടർമാരെ കിട്ടുന്ന പാർട്ടിക്കായിരിക്കും വിജയം. അതത് സംസ്ഥാനങ്ങളിലെ ജനസംഖ്യയനുസരിച്ചാണ് ഇലക്ടർമാർ നിയോഗിക്കപ്പെടുന്നത്. അങ്ങനെ നോക്കുമ്പോൾ ഏറ്റവുമധികം ജനസംഖ്യയുള്ള കാലിഫോർണിയയിൽ തന്നെയാണ് ഏറ്റവും കൂടുതൽ ഇലക്ടർമാരുണ്ടാവുക.  അമ്പത്തിയഞ്ചാണ് കാലിഫോർണിയയിലെ ഇലക്ട്രൽ കോളജ് വോട്ടുകൾ.  കാലിഫോർണിയയിൽ ഭൂരിപക്ഷം ലഭിക്കുന്ന സ്ഥാനാർഥിക്ക് ഈ അമ്പത്തിയഞ്ച് ഇലക്ട്രൽ കോളേജ് വോട്ടുകളും ലഭിക്കും. സംസ്ഥാനത്ത് ഒരു വോട്ടിന്റെ ഭൂരിപക്ഷമാണെങ്കിൽ പോലും മുഴുവൻ ഇലകട്രൽ കോളേജ് വോട്ടുകളും വിജയിക്കു തന്നെ ലഭിക്കും. വിന്നർ ടേക്സ് ഓൾ എന്ന രീതിയാണ് ഭൂരിഭാഗം സംസ്ഥാനങ്ങളും സ്വീകരിച്ചിരിക്കുന്നത്. ഉദാഹരണത്തിന് ടെക്സാസും ന്യൂയോർക്കും ഫ്ലോറിഡയും വിജയിച്ചാൽ തൊണ്ണൂറ്റിയാറ് ഇലക്ട്രൽ കോളേജ് വോട്ടുകൾ ലഭിക്കും. ആ സ്ഥലങ്ങളിലെ ജനസംഖ്യയനുസരിച്ച് ഇലക്ടർമാരുടെ എണ്ണം കൂടുതലായതിനാലാണ് അത്. അതേസമയം സൗത്ത് ദക്കോത്ത, നോർത്ത് ദക്കോത്ത, മോൺടാന, വയോമിങ്ങ് , വേർമോണ്ട്, ന്യൂ ഹാംഷയർ, കണക്ടിക്കട്ട്, വെസ്റ്റ് വിർജീനിയ തുടങ്ങി എട്ടു സംസ്ഥാനങ്ങലിലും ഭൂരിപക്ഷം നേടിയാലും ജനസംഖ്യാനുപാതികമായി മുപ്പത്തിയൊന്ന് ഇലക്ട്രൽ വോട്ടുകളേ ലഭിക്കൂ. അതുകൊണ്ടാണ് പൊതുവേ സ്ഥാനാർഥികൾ ഇരുവശത്തേക്കും മാറി മാറി വോട്ടു ചെയ്യുന്ന കൂടുതൽ ജനസംഖ്യയുള്ള സംസ്ഥാനങ്ങളിൽ കൂടുതൽ ശ്രദ്ധയൂന്നിയുള്ള പ്രചാരണം നടത്തുന്നത്. ഈ ഇലകട്രൽ കോളേജ് രീതി നിലനിൽക്കുന്നതുകൊണ്ടാണ് പോപ്പുലർ വോട്ട് നേടുന്ന സ്ഥാനാർഥി ചിലപ്പോൾ വിജയിക്കാതെ പോകുന്നത്. ഈ രീതിക്ക് വലിയ വിമർശനവുമുണ്ടെങ്കിലും ഇപ്പോഴും രണ്ടൊഴികെ എല്ലാ സംസ്ഥാനങ്ങളും ഇത് തന്നെയാണ് പിന്തുടരുന്നത്. ജനസംഖ്യ കൂടിയ സംസ്ഥാനങ്ങൾക്ക് ആവശ്യത്തിലുമധികം പ്രാധാന്യം കിട്ടുന്നുവെന്നാണ് ഒരു വിമർശനം. അതേസമയം ചെറു സംസ്ഥാനങ്ങളിലെ ഇലക്ട്രൽ വോട്ടുകളും വിജയത്തിന് നിർണായകമാണെന്നതാണ് മറുവാദം. ഇലക്ട്രൽ കോളേജിന്റെ എണ്ണം ഓരോ സംസ്ഥാനത്തും വ്യത്യസ്തമായതു കൊണ്ടും ചില സംസ്ഥാനങ്ങൾ പതിവായി ഏതെങ്കിലും ഒരു പാർട്ടിയെ തന്നെ പിന്തുണക്കുന്നതുകൊണ്ടും ഇരുവശത്തേക്കും മാറി മറിയുന്ന ചുരുക്കം ചില സംസ്ഥാനങ്ങളാണ് അമേരിക്കൻ തെരഞ്ഞെടുപ്പ് ഫലത്തെ നിർണിയിക്കുന്നത്. ഇവയാണ് ബാറ്റിൽ ഗ്രൗണ്ട് സ്റ്റേറ്റ്സ് അഥവാ പോരാട്ട സംസ്ഥാനങ്ങൾ എന്ന് അറിയപ്പെടുന്നത്.

 

 

Fashion

Nov 192020
നിറം വര്‍ദ്ധിപ്പിക്കാന്‍ ഇന്നത്തെ കാലത്ത് പല വിധത്തിലുള്ള മാര്‍ഗ്ഗങ്ങള്‍ തേടുന്നവരും നമുക്ക് ചുറ്റും ഉണ്ട്.

Recipe of the day

Dec 22020
ചേരുവകൾ വെള്ളം- ഒരു കപ്പ് പഞ്ചസാര- 1/2 കപ്പ് നാരങ്ങാ നീര്- 1/4 ടീസ്പൂൺ കുങ്കുമപ്പൂവ് എസൻസ്- 1/2 ടീസ്പൂൺ വെർമിസെല്ലി- 150 ഗ്രാം